Gaga姐嘅打扮永遠都唔會令觀眾失望，佢明知全世界嘅人都對佢嘅行裝好有興趣，所以，每次都會同造型師諗計，一出手就要俾人surprise。

琴日Gaga姐就到倫敦出巡，按照慣例，外型唔爆唔搶眼唔會收手，的確，佢嘅新造型又再帶俾人無限話題，特別對於港人，皆因佢嘅新造型，會令大家即時諗起，經常紮起兩條招牌孖辮，有「小甜甜」之稱嘅龔如心形象非常地咁相似！亦有外國傳媒覺得，十足十童話故事《Pippi Longstocking》入面主角嘅造型。

童話故事《Pippi Longstocking》主角

除咗兩條孖辮仔搶鏡之外，佢面上亦都化「行」晒妝，並唔係話佢搽晒厚粉、畫重眼線、帶晒大眼仔嗰種，而係眼部及眉毛位置，特別地畫咗幾條線，十分有戲劇效果，其他人見到肯定會對佢行注目禮。服裝方面，相對嚟講就比較低調，只係一身黑白色斗篷打扮，可能佢只在乎頸部以上位置呱，小編真係估唔到佢諗乜，俾你估到佢就唔係叫Lady Gaga啦！

Lady Gaga髮型回顧