上次先提到品牌搵咗日本當代藝術大師村上隆合作出聯乘系列，當粉絲們一心一意，留定畢錢作掃貨用途嘅時候，點知今個月頭又殺出「Young at Heart」系列，品牌搵咗Disney班朋友撐場，即係Mickey Mouse、Donald Duck、Winnie the Pooh等等，唔單止鞋款，仲一鋪過出埋backpack、衫褲、連襪都有，絕非小貓三四件咁小家。

憑心而論，鞋款雖然掛上卡通嘜頭，但pattern同拼色都好有時尚感，選色多半用上淺灰、海藍、黑白好易襯，唔會好童真地用咗粉藍、粉紅嚇走一班大人客。
如果粉絲們唔想買咁多鞋嘅話，今次就純可以入手衫同配飾，鞋就留番下次品牌同村上隆聯乘系列先買囉！