早前流行Fast Fashion，結果大家屋企都買落一堆一係冇著過、一係只著過幾次嘅衫褲鞋襪，造成各種浪費。而近年就反其道而行，流行環保物料，令大家可以繼續買新嘢之餘，又能為環保出一分力。例如香港品牌「LANE-EIGHT」就利用環保物料製鞋！

成立兩週年嘅LANE-EIGHT以運動鞋「Trainer AD 1」聞名，鞋款使用回收膠樽製成嘅再生聚酯紗線編織鞋面，除咗貼腳通爽之外，每對鞋亦等於幫忙回收11個膠樽，而鞋面上類似皮革嘅就係純素纖維，比真皮更輕亦更耐用，當然亦可減低製皮嘅污染。另外鞋底入面就有個Bloom藻華泡沫夾層，原材料來自過度繁殖嘅有毒藻類，有助保護環境之餘亦有彈性。買一對等如幫地球減咗64立方米碳排放及慳咗31.5升淡水，但用家依然可以有運動鞋應有嘅保護，再加上香港牌子，每對都只係HK$750，新色有品牌標誌嘅Earth Red。