俄烏戰爭持續，受傷害嘅點都係人民，希望世界真係可以停止戰爭。而足球方面俄羅斯已遭國際足協及歐洲足協即時停賽，所以佢地已經無辦法參加卡塔爾世界盃外圍賽，亦即係唔會有機會獲得11月舉行嘅世界盃正賽資格。

不過雖然俄羅斯已經於國家隊層面被停賽，但佢地仍然徵召球員進行集訓，並將與俄羅斯U21踢一場友誼賽。當然，呢場比賽就唔會有人有興趣睇啦，或除普京之外。

雖然被徵召，但俄羅斯國家隊隊長Artem Dzyuba卻已經要求國家隊唔好加佢入國家隊名單之中，因為佢有感俄烏局勢緊張，而自己又有好多親人喺烏克蘭，所以佢決定唔參加集訓，並向國家隊道歉。

有消息指，大量烏克蘭球員都批評Artem Dzyuba，認為其國家攻擊烏克蘭，但佢並無公開譴責咁惡劣嘅行為。對此，Dzyuka只表示自己並唔係政治方面嘅專家，唔可以話佢支持暴政，但明顯對暴力卻又係視而不見，只能夠說佢唔可能敢得罪普京。

Dzyuba作為俄羅斯國家隊隊長，現年33歲，曾代表國家隊上陣55場，目前正效力辛尼特。