如果唔係因為肺炎疫情，相信唔少香港人上年就飛咗去東京睇奧運，但最後唔好話睇奧運，大家過去呢一年連飛機都冇得坐，而且睇個勢短期內都應該要繼續困喺香港。另一邊廂，東京奧組委似乎就非常有信心可以搞到奧運，根據日本媒體報導，最近仲已經傾緊觀眾入場嘅安排添！

東京奧運主場館 日本國立競技場

根據日本《讀賣新聞》引述多名「政府知情人士」指，目前日本政府正商討緊各個奧運場館嘅觀眾入場人數上限，亦即係話佢哋係準備畀觀眾入場。而入場觀眾需要於入場前一星期內，向日本當局提交PCR檢測嘅陰性證明書，但就唔需要提交疫苗接種證明書，換言之觀眾係唔需要打咗疫苗先可以入場。而日本政府亦會提供免費嘅PCR檢測，目前每日最多能夠做40萬次檢測，奧運期間會再擴充。

圖片：AFP

除咗檢測之外，方案亦指觀眾於入場前要於場館門口做健康檢查 (相信係探熱啦)、會場內必須全程戴口罩、而且不能飲食、不能大聲歡呼，甚至連High Five都唔得。場內會有保安人員將唔合作嘅觀眾趕出場。但如果連歡呼都唔准，咁我做咩要入場睇呢？如果全場坐滿但靜到圖書館咁，又會唔會更加奇怪呢？

資料來源：讀賣新聞