最近有兩個關於英超球迷的調查非常有趣，值得同讀者分享點滴，一個是「英超最性感球迷」，另一個是「最容易網約成功球迷」，結果互相呼應，令人大吃一驚。

泰國知名利物浦女Fans Maneeya

英超最性感球迷 (按排名) 利物浦、車路士、曼聯、阿仙奴、般尼

先睇《Free Super Tips》進行的「英超最性感球迷」排名榜，利物浦以26%得票率居首，車路士屈居次席，獲得20%票數，而曼聯和阿仙奴就分別名列第3、4位，得票率有18%和17%，令人意外的是目前身在降班區的般尼都有10%排第5位，證明球隊成績與球迷性感程序或者無關。第6至10位順序為熱刺、白禮頓、曼城、阿士東維拉和紐卡素，其餘15隊得票率只有單位數。最醜怪是包尾的修咸頓，竟然得1%，莫非撐場的唔係大叔，就係大媽？

老實講，大球會的粉絲人多眾勢，相對地，睇得又露得的數量自然增加，如曼聯就有Rachel Riley、利物浦有星級粉絲Perrie Edwards、車路士則有模特兒Emily Rogawski等。作為英超準冠軍，利迷獲此封號，可說是喜上加喜，咁我哋平日睇波時都可以留意多啲場外風光，驗查呢個調查有幾準。

已經結咗婚生咗仔，曾經的知名曼迷 Tulinhng

網約最易成功球迷 (按排名)

男球迷 曼聯、利物浦、阿仙奴、曼城、熱刺

女球迷 曼聯、阿仙奴、車路士、利物浦、韋斯咸

再睇《Livefootballtickets》網站所做的調查，調查員開了20個檔案，所有資料一模一樣，唯獨所支持的愛隊不一樣，結果發現無論是男球迷抑或女球迷，原來在網上交友平台自認是曼聯球迷，往往最容易成功找到配對。男球迷頭5位順序是曼聯、利物浦、阿仙奴、曼城和熱刺，女球迷順序為曼聯、阿仙奴、車路士、利物浦和韋斯咸。 換言之，如果你想在Tinder或Ashley Madison交友，自稱為上述球迷的話，配對成功率會比其他球迷為高。

當然，如果是利迷，相信打死你都唔會為咗約女自認為曼迷。但如果你平日少睇波，又想增加成功率就值得一試。總之要記住，唔好認係屈福特或諾域治粉絲，因前者排名尾二，後者是包尾大幡，只會令你長約長輸。 無獨有偶，最性感球迷排名前5位之中，除了小球會般尼之外，利物浦、車路士、曼聯和阿仙奴都分別躋身網約最容易成功男女球迷的前5位，看來講到尾，不管男士或女士，都不得不認是外貌協會成員。

好消息是，在網約的世界，第一印象比起身家似乎重要得多。因為根據英超球迷人工榜顯示，白禮頓是最富貴粉絲，平均年薪為4.3萬鎊，之後是車仔、李城、般尼茅夫和修咸頓，但就只有車仔球迷在網約榜獲得優勢，其餘4隊的身份都是唔認好過認。