作為NBA最年輕MVP得主，Derrick Rose今年夏天與活塞簽下一份兩年價值1500萬美元嘅合同，雖然Rose口頭上表示想贏冠軍，但明眼人一睇都知道如今加盟活塞想挑戰東岸冠軍機會都已經可以話微乎其微，更何況總冠軍？

不過今季開季至今，Rose卻表現突出，雖然只係球隊嘅第六人，但卻打出好似當年MVP級別嘅表現，甚至已經成為活塞嘅核心。

就好似今日面對溜馬，Rose雖然交唔出對上幾場嘅好表現，全場打鐵不斷，但去到最後關鍵時刻，Rose卻挺身而出以個人能力成功突破防守，以一記左手高難度擦高板上籃，成功助球隊反超比分，最終活塞成功守住領先贏得今場比賽。

開季四場比賽至今，Rose場均取得25.3分5助攻，命中率高達64.6%，三分球命中率亦達到50％，係活塞表現最出色嘅球員，令活塞目前戰績為2勝2負。

其實睇返Rose過去嘅數據，場均25.3分係其生涯歷史新高，同時投射命中率及三分球命中率亦都係生涯新高，可想而知如今嘅Rose比顛峰時期表現更出色，活塞當日以每年平均750萬美元就簽到呢位MVP，實在係抵到爛！要知道如今嘅活塞另一位主力Blake Griffin仍然處於休養階段，到時等到佢覆出配合埋Rose，隨時成為東岸嘅黑馬。