作為日本最大遊戲、主機開發商，任天堂素來都係日本年輕人最想加入嘅企業之一，而從其最新公佈嘅數字黎睇，任天堂內部似乎都真係一個「天堂」，事關其新入職社員嘅離職率僅低至1.2%，絕大部份人入到去就唔願走！

位於京都嘅任天堂總部

據日本《Business Journal》報導，日本企業招募新社員時，必須透露公司嘅「3年定著率」，亦即最近三年內入職及離職人數嘅比率，供應徵者評定公司嘅吸引度。而根據任天堂最新公開嘅數據，2019年4月至2022年4月期間嘅「3年定著率」為98.8%，換言之只有1.2%社員會於加入任天堂後三年內離職，大約就係每100個新社員中只有1個人。而日本企業嘅平均3年定著率僅為70%左右，換言之有30%人會於入職三年內離職。

據分析指，由於大企業通常會提供較好嘅薪酬福利，所以「3年定著率」本身就會比較高。但任天堂嘅988萬Yen平均年薪 (約HKD52.6萬)，對比起其他日本遊戲廠商其實唔算高，例如Bandai Namco嘅平均年薪就有1100萬Yen (約HKD58.6萬)，Square Enix平均年薪更高達1400萬Yen (約HKD74.6萬)，兩者嘅「三年定著率」都不及任天堂。換言之日本打工仔都唔係單睇錢黎搵工。

據知任天堂內部嘅福利非常好，例如有薪假期比較多，亦對育兒員工方面有好好嘅支援。同時仲有個內部儲分系統，供員工儲分買Game、買書、買機票等等。任天堂嘅形象非常好，例如會對同性伴侶及異性伴侶一視同仁，有充足嘅多元化考慮；內部除咗追逐營利外，亦鼓勵員工作出不同嘗試，以實現「創造優秀遊戲」嘅目標。再加上加入任天堂本身就要過五關斬六將，入咗去自然就唔會輕易離開。以上種種都係任天堂「定著率」奇高嘅原因，或者亦係各大公司值得學習嘅地方。

資料來源：Business Journal