位於英國嘅經濟及商業研究中心 (CEBR) 於每年12月26日公佈「世界經濟前景報告」，而據最新一期嘅估計，受惠於「疫情控制得當」，中國有望於2028年超越飽受疫情打擊嘅美國，成為全球第一大經濟體。

據報告指，雖然橫掃全球嘅肺炎疫情「相信係」源自中國武漢，但「中國當局的強力反應令中國經濟受創遠少於其他經濟體」，2020年更有望錄得2%經濟增長，比起其他相信會係負增長嘅經濟體好得多；另一邊廂美國就飽受疫情摧殘，雖然目前有大規模嘅財政政策支撐經濟，但復甦速度就會比唔上中國。報告估計美國經濟於2022至24年間經濟增長僅為每年1.9%，2025年開始更只有1.6%。反觀中國於2025年前每年都預計有5.7%增長，2026-2030年稍為回落至4.5%。

而如果按照呢個估計，2028年中國就會超越美國，成為全球第一大經濟體，到2035年時中國國內生產總值更會達到近35兆美元，大幅拋離「只有」25兆美元嘅美國。

圖片：截圖自World Economic League Table 2021

另外報告亦預計印度會於2024年超越英國、2027年超越德國、2030年超越日本，最終成為全球第三大經濟體。而台灣 (報告中稱為「Taiwan Province of China」，即中國台灣)經濟就預見只有輕微增長，排名更會由2021年嘅20位跌至2030年嘅26位。

資料來源：World Economic League Table 2021