蔡楓華話一剎那光輝唔代表永恆，呢句嘢用嚟形容今季嘅李斯特城就最合適。上季狐狸軍團帶領我哋成班球迷經歷球迷奇遇記，雲尼亞里用蔗渣錢踢出燒鵝味道，勇奪英超冠軍令人鼓舞。今季陣容上雖然只係有簡迪轉投李斯特城，不過就好似打回原型，目前英超只得13分排第16，雲尼亞里更直言球隊有降班危機。開始有啲口痕友話李斯特城得一季貨仔，上季係負碌，不過你點講都好，狐狸軍團今季有歐聯打，每一步都為球隊創造歷史，就算今季降班李斯特城都應該無悔。

今季李城成績唔好，歐聯戰線當然係好重要嘅因素之一。難得球隊歷史上首次打頂級歐洲賽仲要抽到好簽，搏盡係好合理。雖然周中李斯特城作客波圖大敗5﹣0，不過都夠出線十六強，第一次打歐聯成績已經好唔錯。李斯特城雖然留到大部份上季班底，不過加盟嘅球員好似唔係好夠班，新加盟代替簡迪嘅文迪打防中位置好明顯係完全唔夠班，如果李斯特城想下半季好過啲，就真係要1月買返個防中幫幫真禾特。早排傳過狐狸軍團想買喺曼聯雪咗好耐嘅舒拉達連就絕對係好選擇。

上季李斯特城氣勢如虹，簡單直接嘅戰術幫佢哋驘到唔少波，今季作為衛冕球隊，英超競爭又咁激烈，一定當你李斯特城係強隊看待，做好晒準備對付你，舊年用過嘅板斧要轉都需要時間。另外，上季兩位主力嘅進攻球員表現遜色，特別係上季連續11場英超有波入嘅華迪。到而家所有賽事只係入咗3球，退步得非常緊要，而馬列斯都一樣，助攻數字大減，雲尼亞里呢方面睇怕都要諗下計。

無人會期望李斯特城今季成績會好，因為大家都知上季真係一個奇蹟，即使今季李斯特城降班，相信大家都仍然會好欣賞李斯特城。今季德甲有RB萊比錫呢隊升班馬喺榜首，有人話呢隊係德甲嘅李斯特城，唔好意思，真心覺得唔係同一皮－－萊比錫而家嘅成績完全係金錢堆砌加大玩法律漏洞得返嚟，成隊波無靈魂無歷史，同李斯特城比，絕對係侮辱緊佢哋。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。