對Game迷黎講，2026年最值得期待嘅，當然係多次延期後定於今年11月發售嘅《GTA 6》，但近日坊間就有多個傳聞，指出《GTA 6》可能會再度延期，又或11月發售時唔會有實體光碟版，只有電子下載版。不過近日《GTA》開發商Rockstar嘅母公司Take-Two CEO Strauss Zelnick，就於財報會議上否定相關傳聞，表示《GTA 6》如期發售。

話說上月初時，記者Jason Schreier報導指《GTA 6》開發進度落後，開發人員仲調整緊遊戲核心架構、任務劇本以及世界觀等，佢甚至話「據我聽返黎，遊戲距離完成仲有一段距離。」立即就引起玩家猜測《GTA 6》係咪會再再再再次延期。而到上月底，波蘭媒體《PPE.pl》又引述知情人士，指《GTA 6》於11月推出只會有電子下載版，實體光碟版就可能要等多4個禮拜，甚至到2027年先會推出。據報原因係Rockstar認為實體光碟版會有「流出」嘅風險——應該係指光碟要提早印定，再送去實體店，中途有好多機會被人提早獲取——所以就乾脆決定推遲光碟版。

不過近日Take-Two 方面就一口氣否認哂上面兩個傳聞。先係CEO Strauss Zelnick接受《Variety》訪問時指，延遲推出光碟版「並非我們的計劃」；隨後發佈嘅第三季財報中，就仍然將《GTA 6》嘅發售時間定於今年11月19日，甚至仲話遊戲嘅宣傳工作已經定於今年夏天開始。而Strauss Zelnick接受《IGN》訪問時，亦表示對《GTA 6》能如期發售「感覺很好，非常好！」，仲話「當你越黎越接受行銷關鍵時間點時，你自然就會信心爆棚！」睇到佢咁有信心，似乎大家年尾真係可以玩到《GTA 6》啦！

資料來源：IGN、VGC