各位PC玩家注意，如果你等緊Nvidia今年出新顯示卡，例如RTX 50 Super系列，咁你可能就要失望啦。據外媒《The Information》報導，由於AI數據中心算力需求爆炸性增長，加上記憶體嚴重短缺，Nvidia今年可能唔會推出任何新款GeForce遊戲顯示卡，而下一代RTX 60系列更可能會推遲到2028年先見街。

一直以嚟，Nvidia大約每兩年就會更新一代顯示卡，並喺兩代之間施展精湛嘅「刀法」，推出Super以及Ti型號嚟填補產品線空檔。隨住RTX 50系列喺2025年初正式問世，照計今年應該就會推出RTX 50 SUPER系列，相關規格亦早已流出。不過，面對AI市場需求急升，Nvidia近期正重新調整資源分配策略，甚至不惜犧牲遊戲市場，將產能同資源優先投放喺AI業務之上。

原因無他，就係AI晶片業務需要更大、利潤更高。據《The Information》披露嘅數據，Nvidia在2025年前9個月期間，「運算與網路（涵蓋AI晶片）」業務營業利潤率高達65%，相反「圖形（包含遊戲顯示卡）」只有約40%。另外，隨住AI晶片業務急速起飛，Nvidia業務重心亦出現明顯轉移，喺AI熱潮全面爆發前嘅2022年前9個月期間，遊戲顯示卡收入一度佔公司總收入約35%，但到咗2025年同期，相關比例已大幅下趺至8%，反映遊戲業務已唔再係Nvidia主要收入來源。在商言商之下，Nvidia自然會優先照顧回報更高嘅AI業務，而遊戲業務就被擺到次要位置。

除咗利潤因素，記憶體缺貨亦係另一大關鍵因素。隨住AI數據中心對高頻寬記憶體（HBM）需求急升，各大記憶體廠商都紛紛轉投生產HBM產品，變相令遊戲顯卡用開嘅GDDR7顯示記憶體（VRAM）產能被嚴重排擠，導致價格水漲船高。據聞RTX 50 SUPER系列主要升級，正正就係提升VRAM容量（由16GB升到24GB），所以喺喺記憶體供應又少又貴嘅情況下，Nvidia 更加冇乜誘因急住推出新遊戲顯示卡。

對玩家嚟講，意味住短期內未必可以見到RTX 50 SUPER系列登場，至於下一代 RTX 60 系列，原本市場預期最快可於2027年底量產，但最新消息指相關時間表已被推後，最快或要到2028年先正式推出。