奧地利心理學家阿德勒（Alfred Adler）曾於其著作《被討厭的勇氣》中寫到，「一切的煩惱是人際關係的煩惱」。而人際關係嘅麻煩之處，在於你除咗要考慮自己鍾唔鍾意某件人事物之外，仲要考慮埋身邊其他對同一件人事物嘅睇法。而另一位奧地利心理學家海德（Fritz Heider）於上世紀40年代就推出「平衡理論」，指出人會於一個三方關係中追求一個自己解得通嘅「心理平衡」，亦即點解「敵人嘅敵人會係朋友」。近日一群來自美國Northwestern大學嘅物理學家，就理用統計物理學方法，證實咗「平衡理論」真正存在。

海德嘅「平衡理論」認為人會追求認知上嘅一致性，所以當你（P）同某個人（Q）係朋友，你會希望你嘅另一個朋友（O），都可以同Q做朋友（三方中出現三個正向關係）；或當你（P）討厭Q時，你會希望朋友O都一樣討厭Q（三方中出現兩負一正關係）。而假若當中出現不平衡，例如P與Q、O都係朋友，但O討厭Q（兩正一負關係），對P而言就係認知不一致，於是佢就會調整自己嘅心態，例如跟隨O覺得Q都唔係個好人（將其中一個正變成負）等等，而重新達至平衡。

海德嘅平衝理論指出，呢個三角模型有8種可能性，其中四個為平衡模式，均為「三個正向」或「兩負一正」嘅狀況，用人話講就即係「朋友嘅朋友係朋友」、「朋友嘅敵人係敵人」、「敵人嘅朋友係敵人」，以及「敵人嘅敵人係朋友」。

四種平衡模式及四種不平衡模式。實線為正向關係、虛線為負面關係

圖片：Structural Balance and Signed International Relations

縱然「平衡理論」聽落去非常合理，但過往多次相關研究，都無法穩定地重現理論中描述中嘅「平衡模式」，亦即現實生活中其實有好多處於「不平衡模式」嘅關係。但近來Northwest大學物理及天文學系嘅研究團隊，就利用統計物理學嘅算法，為模式加入兩個約束條件：「社會中唔係每個人都認識所有其他人」、「有啲人就係比其他人更友善」，結果就真係成功證實到「平衡理論」嘅準確性，換言之「敵人嘅敵人係朋友」呢句嘢，依家係有科學根據架啦。

你可能會問，點解人際關係，或者社會學嘅嘢，會由一班物理學家解決呢？據團隊發言人，Northwest大學助理教授 István Kovács，以及博士後研究員BingJie Hao指出，佢哋呢個為「多事物正負關係」加入約束條件嘅算法，除咗可以用於政治兩極化、國際關係等社會學問題之外，仲可以用於神經網絡，或者研究藥物之上。

資料來源：Proper network randomization is key to assessing social balance、neurosciencenews