過去幾年，相信大家身邊都有唔少人選擇離開香港展開新生活，而每個人離開嘅原因，或多或少都係佢已經對呢一片土地失去希望。事實上對身處地方感到失望嘅絕對唔止香港人，就連喺大家眼中係天堂嘅日本，都有高達75%「Z世代 (18-24歲)」表示對日本嘅未來沒有信心。

由日本網絡供應商「BIGLOBE」營運嘅媒體「Ashita Media by BIGLOBE」日前，透過網上問卷方式，訪問進行咗一個全國性「分齡意識調查」，其中有1000名受訪者為18-29歲嘅年輕人 (18-24歲嘅Z世化佔350人)。結果發現，有74.6%嘅Z世代表示「對日本社會的未來沒有希望」，換言之僅有約四份一Z世代對日本社會未來感到有希望。更恐怖嘅係，「有四份一人覺得有希望」已經係所有年齡層中較高嘅一個，例如30代受訪者中僅有16%人覺得有希望、40及50代為18%、60代為22%，最感到有希望嘅係25-29歲，但都只係得32.8%。

而令Z世代對未來失去希望嘅原因中，最多人選擇嘅係「對政治不抱期待」(56.7%)，壓過人所共知嘅「高齡少子化」(42.1%)成為最主要原因。其他原因包括「自己的資產不安全 」(26.8%)、「因不平等而分裂的社會」(24.9%)、「自私的人太多」(19.2%) 等等。

有趣嘅係，當被問到「有否覺得現在的日本正在進步時」，有68%Z世代表示「感覺唔到」，但已經係全年齡層中第二低，僅比25-29歲送群 (64.8%)高。反觀一眾中生代及長者嘅「感覺唔到有進步」比率高達80%或以上。結合30歲以上族群對未來大都沒有希望，似乎就勾勒出一個「30歲以上日本對未來無希望，但又咩都冇做過」嘅消極形象。難怪當問到「會否對年長世代感到不滿時」有高達61.7%Z世代表示同意，並指出「強加過去的價值觀」(62%)、「經濟停滯」(37%)、「政治停滯」(31.5%)、「低人權意識的社會結構」及「少子化令人口減少」(同為30.6%) 為最大不滿原因。

資料來源：maidonanews