三不五時，Facebook就會流傳一張大玩錯覺嘅照片，俾網民估吓從照片中你究竟見到啲乜嘢，而每人都會見到唔同嘅景象，大家一齊估估吓，都幾得意。

不過，純粹叫你估估吓照片中係男係女，條裙係咩色，似乎太過普通，唔夠豐富有趣，小編就推介大家睇睇被喻為近代視覺錯覺大師級畫家Rob Gonsalves，即時被佢嘅所描畫嘅「錯覺藝術」所震撼。

Gonsalves嘅「錯覺藝術」畫作，並非純粹俾大家用嚟測心理，而係一幅真正嘅藝術作品，每個人都可以透過各自嘅慣性視點，睇到畫中其實隱藏著唔同意境。

Gonsalves嘅畫作，經常被人納入超現實類別之中，但事實上，畫中世界多數取材自現實世界之中，或者涉及人類嘅慣常活動，只不過Gonsalves搵到唔同嘅視點，將現實場面混合佢嘅「魔法」之中，令觀賞者從畫作之中，睇到各種唔同嘅世界。