大眾越黎越著重環保，大企業當然亦要努力迎合，一方面為保護環境出一分力，一方面亦能建立更好嘅品牌形象。例如可口可樂就致力於2030年達到「賣一個，收一個」嘅平衡，即係賣咗幾多件貨出去，就回收返幾多個膠樽鋁罐返黎。為咗達到呢個水準，佢哋上年開始已經與世界綠色組織於香港舉行「膠樽回收計劃」，今年再接再勵之餘，更聯同「塑新生」及「民坊」，於香港多個屋邨商場擺放回收機。

所謂嘅膠樽獎賞回收機，其實係一部紅噹噹，外形類似飲品販賣機嘅物體，只要市民投入PET 1號HDPE 2號膠樽後，就會隨機得到由本地設計師張瑋晉所設計、利用rPET回收塑料製作嘅一系列可口可樂精品，當中包括環保袋、水樽、廚具等等。以兩個水樽換到嘅嘢黎講，都可以話係非常化算。

之於收集到嘅膠樽，就會送往可口可樂與歐綠保集團(亞洲)及碧瑤聯手成立嘅「塑新生」，將其轉化為能夠製作其他物品嘅rHDP回收膠粒及rPET回收塑片，亦即係啲精品嘅原材料。

而回收機就會按不同時段，於葵青、酒尖旺、沙田、觀塘、屯門、新界北、西貢及荃灣8區擺放。如果想參與埋一份呢，可以留意世界綠色組織嘅Facebook專頁。