疫情之下，大部份國家都對入境人士都有嚴密管制，例如需要隔離14日再作病毒測試，確保冇確診先可以自由活動。但呢個世界就係有啲人，戴住條監察手帶都夠膽死走出街，又或者係因為有關當局根本就冇監察呢班人有冇好好隔離，所謂隔離就形同虛設。新加坡就宣佈，要求所有入境旅客佩戴定位裝置，違反隔離令仲有可能要坐監！

圖片：Channel News Asia

據《Channel News Asia》報導，新加坡早於今年3月就開始要求入境旅客於自行指定地點隔離14日，當地移民及關卡局最新就要求所有隔離人士都需要佩戴藍芽及GPS定位裝置，以確保佢冇離開指定隔離範圍，部機仲會隨時響而佩戴者需要回應，一旦違規就會直接通報相關機構，最高判罰10000坡紙，即約HK$56,500及入獄6個月。如果係外國人士就會縮短工作簽證的期限甚至註銷簽證。

呢項措施當然能有效地監察隔離人士，但亦好自然地令人提出私隱方面嘅擔憂。新加坡當局就話，定位裝置唔會錄低任何聲音或畫面，定位及藍芽數據都會經過加密，而且只有相關部門授權政府人員，因應監察及調查需要先可以讀取。