文：MenClub 魏文青 POSTED ON 20 Apr 2017
講起《哥斯拉》背後嘅男人，好多人都會知道係有「特攝之父」之稱嘅圓谷英二；但講到哥斯拉入面嘅男人，就好多人都唔知——「係喎，哥斯拉入面係有個人架喎！」。而呢位「哥斯拉」入面嘅男人，就係今年87歲嘅中島春雄。Youtuber頻道「Great Big Story」就搵到佢做咗個訪問，講下佢成為「哥斯拉」嘅經過。
由1954年第一套東寶《哥斯拉》開始，中島春雄就包辦咗頭12套《哥斯拉》系列嘅「哥斯拉」一角。佢憶述當年佢打完二次世界大戰返到日本，就加入咗東寶希望成為一個演員。一開始佢主要係於武士片中做特技人，例如喺黑澤明嘅名作《七武士》中，佢就做一個「斥候C」。後來去到1953年二戰電影《太平洋之鷲》，因為主動請纓出演一個要由著緊火嘅戰鬥機跳出黎嘅士兵而得到《哥斯拉》導演之一本多豬四郎嘅賞識，邀請佢成為「哥斯拉」。
VIDEO
由於當是哥斯拉嘅模樣尚未決定，只係收到劇本嘅中島春雄其實唔知自己要做啲咩，但佢諗既然係大怪物，活動一定好笨重，咁不如就去動物園觀察下大象、猩猩嘅活動方法。事實證明佢嘅估計都冇錯——不過唔係因為哥斯拉嘅設定係重2萬噸，而係因為戰後日本身物資缺乏，劇組只能用混凝土黎做哥斯拉嘅戲服，重達100kg，而且非常悶熱。
辛苦六個月後，《哥斯拉》終於喺戲院上映。因為出色嘅特效，加上當時日本人對核子武器嘅恐懼，《哥斯拉》旋即成為賣座電影，而中島春雄亦接拍咗往後11部《哥斯拉》，以及東寶其他特攝片嘅怪物角色。喺訪問嘅尾聲中島春雄講扮演哥斯拉係佢人生嘅高峰：「我扮演嘅哥斯拉會一直存在於電影之中、大家的回憶之中，而我感到十分感恩。」 Great Big Story
