前幾日港腳白鶴突然喺微博宣布，唔會再為「韓國人金教練」帶領下嘅香港隊效力，仲表示自己係因為唔知金判坤教練全名先咁稱呼佢。但近排大陸有抵制樂天行動，本身係來自中國嘅白鶴嘅呢個舉動，難免令人覺得佢另有所指。大家都知近年足球場上嘅「中港關係」有幾惡劣，所以好多球迷，甚至一啲本土派政治人物都狠批白鶴嘅杯葛行動。不過就我觀察得來，白鶴呢次退隊，睇嚟真係佢個人同金判坤嘅恩怨居多。

公道講，其實白鶴呢個post係非常容易令人對號入座──唔滿意金判坤冇問題，無啦啦叫人做「韓國人金教練」就好易令人聯想近來嘅「樂天事件」。白鶴回應網友提問，如果係由其他韓國教練執教港隊，佢仲會唔會踢落去嘅時候就話，退隊決定只係針對金判坤教練沒選佢入港隊。而如果各位有留意下啲大陸人「愛國行為」，佢哋打算「對付外敵」時，係唔會顧左右而言他，而係光明正地承認，可能仲會有幾分自豪。所以我就認為白鶴今次應該就唔係呼應「樂天行動」嘅。

金判坤帶領港隊兩次喺世界盃外圍賽迫和中國隊，間接令中國嘅決賽周美夢次幻滅，球迷都當哂佢係港隊英雄。不過喺本地波嘅圈子，其實一直有聲音對於佢嘅用人或者戰術不滿。今次事源就係因為備戰三月底嘅亞洲杯外圍賽，金判坤就決定「要用年青球員」為由而棄選白鶴，加上白鶴同金判坤喺南華時合作亦唔算愉快，所以白鶴因為落選而憤而退隊，睇黎就所言非虛。

雖然白鶴為咗自己上陣機會或者其他種種原因就隨便退隊，絕對唔係專業球員應有嘅操守。不過佢入港隊8年，佢又係咪真係無擺過個心喺香港隊？佢微博原文大家可能都只係睇到前半段，後半段「直到香港代表隊不再由（韓國人金教練）帶領為止！我仍然盼望再次和這幫朋友並肩作戰！」其實都解釋咗退隊原因，而佢喺2015年嘅訪問都講過「香港踢波真正是代表香港，那份責任感是不同的，自己很享受代表香港，只要港隊有需要，我便會歸隊。」睇黎都真係對港隊好有歸屬感。或者我哋睇問題時應該冷靜啲，聽其言觀其行先再作評論。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。