英超「俠盗」利物浦上星期六晚又再一次「劫富濟貧」－－主場贏「強隊」阿仙奴3-1，之但係賽事焦點就集中晒去阿仙奴度，主要係呢場大戰雲加竟然將球迷公認表現最好嘅阿歷斯山齊士擺喺後備，仲被鏡頭捕捉到利物浦嘅費明奴入波後山齊士喺後備席偷笑，更甚者有傳媒指呢位智利翼鋒喺賽前訓練因為同隊友爭執所以中途離場，一切不滿都浮哂上面。阿仙奴輸波後跌出前四，球隊真係面臨危急存亡之秋，如果連球隊主將都對雲加失去耐性，咁睇黎雲加喺阿仙奴嘅時間都真係接近尾聲。

雖然小弟無睇直播，但留意到賽前報導雲加希望呢場波球隊可以踢得更加直接，加上奧斯爾因病缺陣，球隊理論上就更需要山齊士。而雖然今晚仲有對拜仁嘅歐聯十六強比賽，但上場都輸咗5:1，今場都只係例行公事，根本就無留力嘅理由。結果中前場正選竟然係恩禾比、韋碧克、張伯倫同基奧特，試問山齊士有乜嘢比唔上呢幾位比？雖知道今季山神已經入咗20球同交出12個助攻，淨係英超都17球9助攻，即係今季阿仙奴入嘅55個英超球有一半都同佢有關。咁都唔出，除咗唔想贏都唔知有乜理由。

唔止Arsenal Fan TV成日訪問嘅球迷Troopz鬧爆雲加，連以前阿仙奴頂時期嘅舊部都頂雲加唔順。基拔圖施華就比較婉轉，佢話雲加係有自己一套，不過其他球會不斷咁改革，而且年青一輩嘅領隊都不斷搵新方法打敗阿仙奴，覺得佢應該要離隊。至於前隊長基昂就完全無面比，批評雲加完全無遵守「以直接打法應戰利物浦」嘅承諾，球員又無鬥心，上半場不知所謂，話呢場可能係20年黎阿仙奴表現最差嘅比賽，仲用「震驚(Stunning)黎形容雲力收起山齊士嘅決定。反觀當年「天才」莫耶斯臨被炒都仲有唔少曼聯前球員幫口，而家雲加嘅情況就更加嚴峻。

去到呢個地步，阿仙奴可以話完全唔使諗山齊士會續約。以山神嘅實力，留喺阿仙奴三年得兩個足總盃冠軍絕對係屈就。足球界有麝自然香，山齊士根本就唔愁無出路，除咗曼城、祖雲達斯同PSG都對佢有興趣之外，連前東家巴塞都想搵佢回巢。至於雲加，就算小弟唔係阿仙奴Fans，都好難接受阿仙奴而家嘅情況，雖然換領隊唔代表一定會變好，不過如果唔有啲改變，「前四杯」嘅劇本只會不斷喺阿仙奴身上重演。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。