文：MenClub 魏文青 POSTED ON 28 Feb 2017
是咁的，早排文青去行唱片鋪，突然發現原來有好多新出嘅黑膠唱片機都好有型(我知佢哋已經出咗好一會兒架啦)，再加上「聽黑膠」呢樣嘢本身就好型，所以就有啲心郁郁想買返部返屋企。但一來間屋其實就冇咩位畀我放多部黑膠，二來用聽黑膠始終冇聽數碼版本咁方便(起碼你飛唔到歌先啦)，所以到依家都仲係心大心細。就喺呢個時候，我就見到呢部喺Kickstarter集緊資嘅智能唱片機，如果佢真係出到，可能可以一次過解決哂以上所有問題喎！
VIDEO
呢部叫做「LOVE」嘅智能唱片機有光亮而且流線型嘅機身，睇落就有啲似一隻變大咗嘅無線滑鼠。佢嘅賣點有兩個，第一係慳位。「LOVE」嘅唱針係裝喺機底，用嘅時候係將成部機放上隻黑膠唱片到，而且唔係隻碟轉，係部機自己轉，因為慳咗唱臂嘅位，所以基本上佔嘅位置就係一隻黑膠咁大。
另外佢係一部「智能唱機」，你可以透過藍芽或者Wi-Fi連接其他智能裝置，再用專屬嘅APP控制「LOVE」，除咗控制音量、轉速，仲可以揀歌。亦可以將隨機嘅3.5mm裝置插入其他播放裝置，就可以增強播放能力，甚至可以Link返藍芽耳機黎聽，呃…咁我算唔算聽緊黑膠呢…？
以上種種，目前喺Kickstarter只需299美金(約2320HKD)就可以帶返屋企，難怪佢只係發起咗一日就已經「超額認購」兩倍幾。如果大家對佢有信心，不妨就參加埋一份啦！ Kickstarter
