今個新精頭，曼聯球迷一定最開心，事關大年初一死敵利物浦喺足總杯主場輸俾狼隊出局，，曼聯就以4-0大勝一樣係英冠球隊嘅韋根出線。贏波當然開心，不過更高興係呢季被摩連奴棄用嘅舒韋恩史迪加終於重返正選，仲為球隊貢獻1個入球1個助攻。無論小豬定係球迷，雞年用呢場波開始真係令人幾興奮。

雖然呢場足總杯曼聯嘅對手係英冠排緊尾三嘅韋根，但曼聯上半場見唔到有任何明顯優勢，頭20分鐘連一腳射門都無。梳爾、馬迪爾兩位先後被摩連奴批評嘅球員亦無表現。至於小豬初段就適應比賽當中，不過擔任中場指揮官依然稱職，亦有壓場感，控制攻守節奏都好出色。去到上半場臨完場交出一個貼門又準繩嘅長傳助攻費蘭尼頂入先開紀錄。曼聯拎住一球入更衣室，下半場就更敢於進攻，史摩寧同米希達恩先後入球拉開比數，80分鐘小豬嚟一個倒掛4-0埋齋仲拎埋全場最有價值球員。如是者小豬渡過咗一個美滿嘅晚上。

曼聯近來爭取緊同卡域克續約，而卡域克在陣與否嘅曼聯表現都爭好遠，重要性喺邊相信都唔需要多講。而目前曼聯陣中同卡域克同類型嘅球員，又真係得小豬一個，曼聯而家面對四條戰線，小豬絕對可以分擔卡域克嘅負擔。好似摩連奴所講，迪比同舒拉達連離隊，而家中場需要人腳，所以摩連奴已經將小豬加入歐霸盃名單當中。至於有人擔心曼聯中場已經有普巴、靴里拉、卡域克、費蘭尼，小豬好難爭得贏，但普巴、費蘭尼同小豬係唔同類型，靴里拉打墮後中場仍在學習中，喺呢段時間俾小豬幫輕下，相信小豬都會得到唔少上陣時間。

如果一個有質素嘅球員被下放到預備組集訓、領隊講到明賣唔走都唔俾人打，仲沒收埋locker、球會大合照都無份，唔多唔少會心灰意冷，甚至埋怨球會，呢啲情緒可以理解，但小豬由摩連奴嚟到曼聯直至星期日從未埋怨過曼聯一句，甚至不停喺社交媒體幫曼聯打氣，呢種毅力喺當今足球圈已經好難搵，相信小豬亦都鼓勵唔少正面對困境嘅朋友，對於曼聯青年軍亦係好好嘅學習榜樣。有時足球我哋想睇嘅，未必係入球或者球隊奪冠，呢啲赤手空拳為自己打出一片天嘅小故事，都係我哋捱夜睇波嘅動力嚟。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。