唔經唔覺，球季又過咗一半，不論你支持邊一隊，相信都會認同今季英超非常難打。前列球隊爭冠或者歐聯席位就唔使講，有時連中下游球隊都偶有佳作，護級方面尾四位都只係相差4分，競爭認真激烈。不過相信各位都會比較關心前列球隊嘅形勢，所以呢次同下次就講下英超前列嘅半季總結。

車路士– 49分

有人講笑話車仔同李斯特城呢季好似交換左靈魂一樣。車仔上季幾乎要護級，但今季就平埋阿仙奴喺2001-2002年球季創下嘅13連勝紀錄，後面幾隊真係等食塵。干地新帥加盟第一季就咁出色，除咗戰術簡單直接容易執行，佢管治球員亦的確係有一手。上季表現麻麻嘅前鋒迪亞高哥斯達爭啲就重返馬體會，但干地除咗成功令佢DC留隊，連佢嘅紀律問題都改善埋，少咗踢人多咗踢波，而家佢仲以14球居射手榜首位。而且車仔今季無歐洲賽顧慮，爭取英超冠軍自然有優勢。

利物浦– 44分

高普嚟到利物浦後提供咗一套適合球隊嘅進攻模式，除咗新加盟嘅沙迪奧文尼持續有好表現，近排又打起咗同樣黎自修咸頓嘅拉蘭拿。事實上利物浦今季表現的確比以往穩定，絕對值得第二位嘅成績。至於能唔能夠更上一層樓，當然就同佢哋嘅防守好有關係。上場作客新特蘭送咗兩球(爭議性)12碼俾對方搞到痛失兩分，事後卡拉雲、尼達利基尼同洛夫雲都先後向球迷道歉。不過最大問題睇黎都係門將，本來喺德甲搵到卡里奧斯以為可以解決問題，點知原來只係德國版米奴列，而家就傳佢哋想買啱啱先被哥帥放棄嘅祖赫特返黎，成唔成事就唔知啦。

曼城– 42分

曼城就真係家門不幸，開季所有賽事十連勝，加埋哥迪奧拿嘅CV，好多人以為佢可以帶領曼城得到拜仁慕尼黑級數嘅成績，點知打咗半季個個位置都好似有問題：前鋒夠古路唔係無態就受傷，中場費蘭甸奴又再領紅牌，德國玻璃人根道簡又重傷收咧，中堅史東斯表現未見穩定，門將巴禾又似乎無意適應英超，更有傳哥帥借走祖赫特成為失去曼城人心嘅導火線，而且極端追求控球打法喺英超備受質疑，睇黎今季都係保四最實際。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。