今晚平安夜，對真毒嚟講係全年最黑暗嘅日子，不過我相信大家睇得MenClub都係高質素男士，一定有著落嘅遲早！所以先祝各位Gentlemen聖誕快樂！新年進步！講返波，1月轉會窗就到，球季打到一半，無論球會球員對自已表現都心裡有數，想尋求改變定平穩過渡呢季，嚟緊都有機會做決定。今年幾得意嘅係，聖誕未到已經有好幾單轉會同炒領隊新聞，不如今次就同大家講下。

連迪路夫加盟曼聯

曼聯今季有摩連奴加盟之餘仲大灑金錢增兵，不過成績就同付出唔成正比，為爭前四位置曼聯冬天都要使啲錢。Skysports報導曼聯初步會以3800鎊由賓菲加變購瑞典中堅尼迪路夫。聽講曼聯已經留意咗佢好幾年，而前鋒伊巴謙莫域對呢位同鄉更加讚不絕口。大家都覺得呢個價係貴咗少少，但係人都知拜尼有傷又要打非洲國家盃，1月後防絕對等人用，唔劏你劏邊個呀。

水晶宮炒柏祖

水晶宮呢幾年長駐英超擺脫升降機命運，對佢哋嚟講算係球會高峰架啦。上年年頭柏祖由紐卡素加盟，以第十名完成英超，仲帶領埋球隊殺入足總杯決賽，真係威威豬。但踏入2016年水晶宮全年只係贏咗6場英超，而家只係以15分排第17位，睇怕都要打護級。而前日水晶宮官方正式宣佈柏祖離隊，唉，明明早兩個星期班主仲開聲撐柏祖，不過輸俾曼聯同車路士之後就咩都變晒，而有傳佢哋嘅接任人選係英格蘭短命領隊艾拿戴斯，都好呀，有呢位護級專家喺度留喺英超應該OK嘅，不過水晶宮球迷就唔多支持咁囉。

奧斯卡轉投上海上港

中超球會特別鍾情車路士球員，繼丹巴巴亞同拉美尼斯之後，巴西中場奧斯卡以6000萬鎊轉投上海上港。奧斯卡先25歲就去中超搵真銀，坦白講真係幾無志氣，亦明白點解堂堂五屆世界杯冠軍巴西會沒落，啲球員對榮譽無慾無求，變哂講金唔講心囉。

德斯拿轉戰PSG

本來德斯拿夏天已經受到祖雲達斯同阿仙奴注意，但最終都未能夠成功轉投豪門，搞到呢位德國天才翼鋒同禾夫斯堡嘅領隊、體育總監不和。但呢個冬天佢終於可以一圓轉會心願，PSG將以3600萬歐元羅致佢。德斯拿可唔可以喺豪門證明自己當然令人期待，只係PSG 今季問題係伊巴離隊後少咗個可靠射手，咁點解唔係買前鋒先呢？PSG而家喺法甲只係排第3，想翻身1月轉會窗要好好部署。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青