一講起曼城，次次季前都俾佢哋華麗嘅中前場陣容嚇疾，不過近年又季季成績都麻麻地，上季由柏歷堅尼帶領只能夠以第四完成聯賽，都算係相當丟架。今季由哥迪奧拿執教，加埋班睇落超班嘅中前場，球迷都好期待哥帥將巴塞理念移殖去曼城。而英超開季時，曼城都係威係勢做到六連勝，哥帥仲話需要一場敗仗咁寸添。但近來成績就認真麻麻地，近9場比賽都只有上輪對屈福特無失波，防守問題仍然無改善，積分上同榜首嘅車路士已經有7分差距，或者哥帥真係要有啲轉變，唔係咁落去，分分鐘連前四都爭唔到。

今季曼城嘅最大爭議當然係將英格蘭門將祖赫特外借離隊，同時以巴禾作為首席門將。哥帥鍾意以門將作為攻勢起點呢樣嘢係人都知，不過嚟到英超，呢套就唔多好用。一來巴禾仍然未適應到英超，大家隨口都講到一兩個巴禾攞命嘅失誤；二來近日有報導指巴禾其實相當後悔加盟曼城，唔單上到依家都未學英文，又討厭英國天陰同寒冷嘅天氣，仲同朋友講要返去巴塞做達史特根後備都無問題，都唔知仲留得幾耐。而曼城二號門將卡巴尼路都係派膠王，1月又唔會有球會賣走有料到嘅門將。如果哥帥唔打算1月收返祖赫特，就要諗諗計幫巴禾盡早適應英超生活。

其次，曼城可能要搵定隊長甘賓尼嘅接班人。指揮防線、表現穩定、仲要有入球能力，中堅嚟講甘賓尼真係好高質素，但係經常受傷唔能夠上陣令曼城防守大打折扣。上個月作客水晶宮嘅比賽佢打咗廿幾分鐘就受傷退下火線。呢個亦係曼城要經常轉換防線組合嘅原因之一。除咗要重新思考由防線開始攻勢嘅戰術係咪需要改變，亦要以而家嘅人腳去搵到一條可靠嘅防線，同時而家睇定中堅下季買就差唔多。

我唔敢話哥逼奧拿以前教巴塞同拜仁成功係因為本身隊波超班，唔使佢點教都會贏，不過曼城同哥迪奧拿以前教嘅球會真係有好大分別。一來曼城仍然係新晉勁旅，二來英超本身就係競爭好激烈嘅聯賽，風格同西甲德甲都好唔同。哥帥想喺曼城成功，可能要忘記過往喺前兩間球會嘅成功，謙虛啲謹慎啲去應付呢個聯賽。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青