世界賽登頂 IVE奪《LOL》國際大學冠軍

文：MenClub 魏文青　　
POSTED ON 14 Nov 2016

IVE世界第一！IVE世界第一！IVE真係世界第一！很重要一定要講三次！作為一個香港毒L，IVE電競隊成為世界冠軍呢件大事係絕對要熱烈慶祝！佢哋早前就去咗台灣參加「2016英雄聯盟國際大學冠軍賽(LICC)」，擊敗來自台灣、中國、越南、泰國、菲律賓等地嘅其他參賽大學，成為總冠軍，羸到5000美元獎金獎品！邊個話打機唔可以出人頭地呀！
圖片：截圖自Garena
首屆LICC於於11月11~13日舉行，參加者全部都係來自不同國家嘅大專生，而本港代表就係IVE。佢哋先於12日舉行嘅分組賽出線進入四強，對上來自越南嘅「越南胡志明市食品工業大學(HUFI)」。賽事採用三盤兩勝制，首局IVE由頭贏到尾，以壓倒性優勢奪得一勝；第二局開HUFI開局佔優，但IVE中局搶回優勢，先後拿下兩次「巴龍」(地圖中立怪物，能大副加強隊伍能力)，最後贏得比賽進入總決賽。
圖片：截圖自Garena
總決賽對手係於四強賽贏咗新加坡共和理工大學嘅中國海口經濟學院(HKC)。首局早期HKC佔優，更加於11分鐘時打出一個「ACE(在對方隊員重生之前擊殺全部其他隊員)」，但IVE把握時機拿下地圖資源，所以隊伍經濟依然僵持。後來雙方多次碰撞，但每次都由IVE稍稍佔優，優勢逐漸拉開，最後又靠一次「巴龍」拿下勝利。
圖片：截圖自Garena
第二埸雙方繼續僵持，但HKC較能把握地圖中立資源，24分鐘拿下巴龍，再加上前後四條元素龍嘅增益效果，再靠隊伍組合拉大優勢，扳回一城。
圖片：截圖自Garena
去到最後一場，IVE前期依然受壓，但HKC因為一次失誤，殺人變被殺，令雙方經濟未致大幅拉開。24分鐘IVE捉到對方兩人，之後仗住人數優勢拉下巴龍，經濟反超，六分鐘後打出一個ACE再羸下該局。總比數2:1羸下總決賽，成為首屆LICC冠軍。
IVE贏得冠軍一刻圖片：截圖自Garena
事實上今次都唔係IVE第一次為港增光。六月嘅時候佢哋參加於台灣舉行嘅「2016 Garena校際杯」，於總決賽以2:1擊敗國立台灣師範大學羸得冠軍，當時於電競界之言都算係大事。今次贏得LICC更加得到各大傳媒報導，正式走入大眾認知之中。希望除咗令大家更加認識電競，亦可以推動香港電競發展啦！