又到星期六，有假放固然開心，但更開心就係有波睇。今季英超未開季，就幾乎可以睇到爭標睇怕會由頭打到尾。以前嘅歐洲賽常客今季變英超本土派，只有本土賽事要應付；又有球隊改革幾年今季到咗收成期；亦有球隊大灑金錢，雖然未有成績，不過羽翼初成。英超唔計今晚已經打咗九輪，賽季已經去咗四分一，一至五位只係差一份，頭七位都有機會爭到冠軍，可以話係近年少見。

最值得講就係兩隊轉打三後衛嘅球隊，分別係曼城同車路士。先講車仔，干地將祖雲達斯同意大利嘅三後衛打法帶到車路士，4-0大炒曼聯肯定干地改革成功，現時要擔心嘅係因為傷兵問題鬧中堅荒。可能各位會擔心意識差兼隨意標波嘅大衛雷斯，不過干地打呢個陣式買佢回巢可以理解，進攻佢可以走上防中位置封殺對手反擊機會。至於前場，摩連奴時代多次被外借嘅摩西斯咸魚翻生同埋今季回勇嘅夏薩特，都令車迷唔需要擔心火力。

至於曼城，其實除咗甘賓尼真係無邊個後衛可靠，但甘賓尼經常有傷患問題，今季由愛華頓買到好似好識用波嘅史東斯，不過呢位英格蘭後防明日之星職業生涯都未打過三後衛，處理回傳問題喺上星期迫和修咸頓場波現晒形，至於奧達文迪早兩年喺華倫西亞都有唔少甩轆。最值得講當然係門將包禾，語言問題同未適應英超風格令佢派膠唔少次，不過相信只要俾夠時間佢，都可以回復巴塞時期嘅表現。至於前場，好似只要迪布尼無上陣或者未有態曼城就贏唔到波，呢個都係哥帥要處理。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青