{ SKIP }
文:李羅渣  
POSTED ON 08 Oct 2016

圖片:fifa


歐洲國家盃決賽周今屆首次增至24隊,得益於新賽制而得到冠軍嘅葡萄牙,贏得有無說服力都引起一片激辯。無論你覺得葡萄牙贏得有無說服力都好,呢次改制外間反應都係麻麻地。不過FIFA主席恩法天奴近日在就提出世界盃決賽周可以由32隊增加到48隊,真係唔知FIFA主席其中一個技能就係度屎橋呢?


圖片:Telegraph


恩法天奴喺一間哥倫比亞大學發表呢個建議,而FIFA就會一月開會討論。個玩法是咁的,就係有16隊種子隊會直接入分組賽,其餘32隊就分組賽開波前三日就打一場,勝方就可以進入分組賽,即係分組賽都係32隊,之後就好似以前咁。點呀?你明唔明?唔明好正常,因為我寫呢篇文時都睇咗兩三個報導先消化到。呢個建議真係認真整色整水。


圖片:fifa


呢個48隊制某程度上係一個假改革,因為有16隊打一場波就會返歸,簡單講,就係一個去主辦國打嘅附加賽。打多16場波,即係又有得轉播,多咗國家隊參加世界盃決賽周,又有更多唔同國家嘅財團贊助,雖然恩法天奴話目的係希望更有效地借助世界盃推廣到全世界。不過講到呢到,大家都會知道搞咁多嘢,FIFA 都係想賺多兩個錢。雖然呢個改革無歐洲國家盃最佳第三名入淘汰咁差,不過仍然係整色整水,阿茂整餅。


圖片:mirror


個人認為,呢個建議通過機會唔大,表面上入世界盃決賽周嘅隊伍多咗,但有

16隊踢一場就返屋企,一來國家隊只為一場波大費周章一啲都唔化算,加上而家球會賽事越嚟越多,球員為踢呢場波失去休息時間更加係白忙一場,而FIFA就坐定家收贊助同轉播費,真係國家隊出雞FIFA出豉油。以為百禮達落台FIFA有番新氣象,但而家恩法天奴提呢啲建議都知道唔使對FIFA咁有期望。


李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達,最想成為有些少生活品味嘅偽文青








由金像大導James Cameron操刀嘅《阿凡達:火與燼(Avatar: Fire and Ash)》將於下月正式上映,但佢最近接受訪問時就坦言,若然今集賺得唔夠多、無法說服迪士尼再投資。咁佢就會放棄拍攝第4及第5集,改為寫一本書交 ...
hobby
【影視】 James Cameron直言《阿凡達3》若票房未達標 或終止後續電影改為寫書交代故事
28 Nov 2025
為慶祝高達全新官網GUNDAM Official Website正式上線,官方自10月10日起展開特別企劃《全世界高達總選舉2025》,邀請全球Fans票選出世上最受歡迎高達。隨住投票將於12月25日截止,近日官方公布中期結果Top 20名單, ...
hobby
【高達】《全世界高達總選舉2025》中期結果出爐 SEED系列機體強勢佔多席位
28 Nov 2025