圖片：101greatgoal

點解今日要都有足球睇既？因為艾拿戴斯因為喺記者放蛇嘅行動中答應變40萬英鎊，仲願意去新加坡同香港做顧問去教記者假扮嘅商人點樣可以繞過英格蘭足總禁止透過第三方，即係體育管理公司、經理人公司之類去收購球員。當電訊報報導後，英格蘭足總就決定同大Sam解約。大Sam只係教完對斯沿伐克嘅世界盃外圍賽就被炒，成為史上最短命嘅英格蘭領隊。

圖片：mirror

其實FIFA近年都好著力去打擊第三方對球員擁有權嘅問題，因為由第三方擁有球員會製造好多轉會手續同埋法律爭議，甚至不法商人可以利用第三方球員轉會去洗黑錢。而艾拿戴斯本身都有涉及不合法交易嘅前科，今次明目張膽答應記者幫佢哋走法律罅，仲口頭應承收回佣，所以係幾大件事。最大影響當然係英格蘭臨打世界盃外圍賽前要換帥啦，修夫基忽然要頂埋教一隊。

圖片：mirror

咁大Sam將來喺球壇仲有無運行呢？佢自己就叫大家點下點，似乎好有信心咁，咁又係嘅，話晒都護級專家喎，而家都就快10月，應該有啲下游球隊考慮會換領隊架啦，又咁啱大Sam兩間舊會韋斯咸同新特蘭成績都係一落千仗，今季又咁興愛回家，都有可能發生架。有博彩公司開賠率賭大Sam下一站，分別係英冠嘅打比、中超、英職同埋仲未贏到英超賽事嘅史篤城。

圖片：mirror

大Sam恨教英格蘭就係人都知，今次貪字得個貧搞到教三師軍團夢碎，呢個教訓都算係幾大。咁英格蘭下任領隊又搵邊個好呢？暫時人選除咗替工修夫基之外，仲有同大Sam爭過嘅前侯城領隊布魯士、熱刺球迷想撕開兩邊嘅荷杜、水晶宮領隊柏祖、英藉領隊新星般尼茅夫嘅艾迪賀維，仲有美國領隊奇連士文。俾你揀，你又想邊個做先？

李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青