手痕友恩物! Fidget Cube

文：MenClub 魏文青　　
POSTED ON 13 Sep 2016

每一個Office，都至少有一個「手痕友」。呢位手痕友嘅最大病徵，就係隻手一定要搵啲嘢轉下啪扭下撚下先安落！例如見到啲「泡泡紙」一定要撳爆哂佢；或者坐落人哋張檯到就開始怒撳人哋啲原子筆；再唔係就開會嘅時間係咁轉筆，但又轉得唔好所以係咁跌落地嘈鬼住哂。而喺MenClub office，我就係呢條煩膠。而由於連我自己都覺得自己煩嘅關係，我已經上Kickstarter訂咗呢粒Fidget Cube返黎啦！

其實所謂手痕，大部份都係因為為咗舒緩壓力，又或者令自己專心啲小動作。而呢一粒Fidget Cube，就係一粒專門滿足你手痕慾望嘅檯頭玩具。呢粒有如骰仔咁嘅玩具，總共有六個裝置畀你慢慢撚，包括一個稱為「breathe Zone」、畀你用隻手指公係咁捽嘅凹位；五粒按鈕，其中兩三粒有聲，兩粒係靜音；一個有模仿遊戲機手掣上嘅操作桿；一個燈掣(個人最期待!)；三個打直轉嘅齒輪加一個可以撳落去嘅鐵珠同一個水平轉嘅轉盤。

唔好睇呢舊嘢好似好無聊，佢乃係近日喺Kickstarter上最受歡迎嘅產品之一。由八月開始募資到依家，已經籌到三百幾萬美金，超出目標(15000美金)金額2000倍！可想而知呢個世界有幾多無聊人！最平19蚊美金，即係150蚊港紙就有一粒！為咗你身邊人著想，你都買返粒啦！
kickstarter