圖片：Fourfourtwo

今季轉會曼聯不再空炮，話簽邊個就簽到邊個，摩佬都算做到嘢啦。之但係有入就有出，上季來投嘅德國中場舒韋恩史迪加近日就傳出被下放同預備組跟操兼俾人清埋儲物櫃，睇個勢喺曼聯都係擺唔耐，其實小豬上季雖然成日受傷，不過佢仍然有好大作用，講要清洗，排隊都未到佢。

圖片：Skysports

眾所周知小豬本身係打左翼，不過佢突破能力就相當一般，當時拜仁嘅領隊雲高爾就睇中佢身體強壯，而且傳送唔錯，就改造佢成為防守中場，效果大家有眼見都唔使多講。曼聯一向都缺少墮後中場幫手較炮同控制節奏，呢個都係曼聯進攻乏力主因。而曼聯近年搵過唔少人取代年事已高嘅卡域克，但都唔成功。雖然可以客串中堅呢樣嘢小豬可能冇，但其他工作小豬都唔會比卡域克差，同類型嘅白蘭特同靴里拉又唔係同一個水平，同新加盟嘅米希達恩同好快會加盟嘅普巴又唔係呢類型，，萬一卡域克又傷一頭半個月曼聯點算呢？

圖片：mirror

今年德國歐國盃嘅大軍入面仲見到小豬，既然喺曼聯都傷多過踢，點解仲俾佢入選？領隊路維就話小豬喺大賽點都有佢作用。連波歷克喺歐國盃前都叫路維一定要選小豬，因為佢係德國而家缺少嘅領袖，而事實都證明佢哋無錯，喺分組賽對烏克蘭時小豬補時換入兩分鐘就入波。唔止國家隊，就算喺曼聯佢都有呢種強大嘅精神力，曼聯而家咁年青，小豬嘅經驗一定幫到一眾小紅魔，而且落襯場小豬都唔會懶散，比某位鍾意打拳嘅英格蘭大哥更適合做隊長，講邊個？唔開名你都知架啦。

圖片：Skysports

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。