圖片：espnfc

韋斯咸上季喺英超遇神殺神遇佛殺佛，除咗領隊比歷有料到之外，上季新加盟嘅法國中場柏耶有貨交都係功不可沒。柏耶唔止喺球會有貨交，打歐洲國家盃一樣有好表現。所以變成轉會市場搶手貨都係意料中事，不過柏耶就率先表態，今季點都會留隊。

圖片：bbc

柏耶自從上季打起咗一路都係各大球會收購目標，當中興趣最大係皇家馬德里。但同韋斯咸合約去2021年嘅柏耶就同英國太陽報講明，新球季一定留隊「我聽過好多傳聞，但沒有反應。因為我愛韋斯咸，所以100%會留隊，我向球迷保證這一點。」捧韋斯咸嘅球迷，唔知你哋放唔放心呢？

圖片：telegraph

韋斯咸下季要打歐霸盃，絕對需要加強陣容應付三條戰線。韋斯咸又唔算係有米球會，如果啱價放走柏耶買人都唔出奇，始終而家先七月。不過俾我係比歷，就一定留返柏耶，買人之餘都考慮下同其他球會借人，再升啲青年軍上一隊組軍。放主力套現買人失敗嘅例子有好多，例如早幾年賣走巴爾嘅熱刺，上季降班賣走賓迪基同戴夫嘅阿士東維拉，而柏耶對韋斯咸嘅作用，就同前面所提及嘅球員一樣，如果韋斯咸下季想大搞，柏耶真係多多錢都唔賣得架。

李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。