圖片：espnfc

唔知大家點睇今屆歐洲國家盃決賽周加到24隊，對威爾斯或者冰島呢啲大賽稀客一定係好事啦，而啲以前因為國家隊實力問題而好難喺國際大賽見到嘅球星，好似古莊臣咁都可以臨老入決賽周係正嘅，不過競技角度嚟講又好似無咁高競爭性，德國領隊路維就話新賽制之下可能有球隊拎一分就出到線，聽落又好似幾無癮嘅。

圖片：telegraph.co.uk

路維咁講，又唔係話無道理，入得決賽周，就梗係精英中嘅精英啦，加多8隊係令歐國盃決賽周個含金量低咗，入十六強更加唔使講啦，而家唔使爭頭二名，第三位都有得諗入十六強，守和三場都有三分喺手，搏有一兩組第三位得一兩分，咁就入十六強，變相係更鼓勵球隊打得保守一啲，今屆你見一場波入三球已經算好多波入，某程度上都係因為個賽制令啲球隊願意打防守。

圖片：Talksport

不過更多隊入到決賽周，我哋又有更大機會睇到神奇球隊出現，雖然新制競爭性係低咗，但換個角度睇又唔係完全唔好睇，盃賽嘅嘢，無話強隊一定玩晒嘅，有幾隊實力無咁強嘅球隊入十六強搞局，變數都幾多下架，而且淘汰賽同分組賽打法又唔同，有啲意想不到嘅賽果出現都唔定。

圖片：thefa

我同啲朋友都有傾過歐國盃改制，有個朋友話改制都可以，照有24隊，但分八組，一組三隊，打完小組首名就有八強。聽落幾刺激，又夠晒精英，一定隊隊都打到拳拳到肉無力留，有得諗架，唔知各位Gentlemen點睇啦。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、網台節目主持、Menclub足球文章作家、演

員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。