今年又係國際大賽年，完咗聯賽又要睇歐洲國家盃同美洲國家盃，想汁都撈埋睇埋奧運足球仲都得。有國際大賽就梗係要買件新波衫幫愛隊打打氣啦，NIKE終於都公佈咗一系列新嘅國家隊波衫。今次繼續佢哋一貫嘅「簡約」設計，仲有非常貼身嘅剪裁，雖然有些少似PUMA，不過都真係幾型棍。但如果你支持嘅球隊都係NIKE嘅，係時候操fit少少襯返件波衫。

點都要講下英格蘭嘅，一如以往都係主場白色作客紅色，兩個款袖嘅位置顏色都有些少唔同，唉，真係好難形容，因為實在太「簡約」，反而今次英格蘭嘅心思擺咗喺波襪度，棄用同波衫一樣嘅白色，反而主場就襯紅襪，作客就襯藍襪，係全套衫最有心思嘅地方。

跟住就係巴西，本身巴西嘅經典黃色已經係信心保證，點都唔會核突得去邊。再加埋多邊形暗花，令到成件衫好有科技感，簡單得嚟有活力，件衫咁醒目，巴西球員唔怕交錯波啦。

葡萄牙係以前做過巴西宗主國，兩個國家都有啲淵源，可能係咁NIKE就用返咁上下嘅設計，反而我唔係咁鍾意作客隻綠色，感覺好忌廉，而且一望落去以為係龍門衫嚟。

至於美國喇，香港應該無乜美國隊球迷，主場都係白色啦，不過袖口就用左鮮藍色，成件衫睇落有啲似＜網球王子＞班角色嘅戰衣，而由嘅末端就有「1 Team」嘅字樣；作客更有型，主色用黑色，而兩邊袖位分別用紅色同藍色，成個配搭有型有款，三隻色撞埋又啱啱好，唔會覺得件衫好混亂。

至於法國，設計好似真係hea咗啲喎，不過隻藍色係幾好睇但，而作客衫就白色為主，睇落都幾似法國國旗。

土耳其呢件都算係NIKE今轉波衫少有比較特別，大家都知土耳其主場波衫一向都係紅色，不過今次就搞搞新意思喎，用咗隻感覺有能量嘅紅色，再配埋細緻嘅網紋，都幾似蜘蛛俠架，球員著上去都幾有霸氣，未開波，氣勢上已經贏晒對手。

而克羅乎亞大家都知佢地一向都以紅白格仔作為主場球衣主色，今次就連作客都用同一個設計，不過就轉為藍色，而今次花紋都有唔同，由以前比較工整嘅格仔變為感覺好似國旗飄揚嘅設計，都相當有動感，你睇摩迪著上身幾好睇。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。

facebook: https://www.facebook.com/leerogerfcpage/

footyheadlines