圖片：express.co.uk

2月29日新國際足協主席恩法天奴正式上任，取代飽受貪污醜聞困擾嘅白禮達，恩法天奴上任無幾耐就邀請一班球星踢友誼賽，仲聲言要盡快推動之前講好嘅改革。新人事新作風，好有希望咁款喎，少年你太年輕了，唔使對佢太有期望啦。

圖片：goal.com

恩法天奴2000年加入歐洲足協正式投身國際球壇，未加入歐洲足協前係一名律師，擁有意大利同瑞士雙重國藉。喺歐洲足協工作期間推動豪門最怕嘅公平財政原則、將歐洲國家盃決賽周入圍球隊伍增加到24隊、又協助規模較細嘅歐洲足協成員得到更大商業支持等。咦？睇嚟真係FIFA新希望喎！不過球壇中人都知佢係柏天尼嘅親信，而柏天尼做歐洲足協主席做到咁多爭議，恩法天奴係咪真係可以寄予厚望，大家都應該有個底啦。

圖片：fifa

當然，做人就唔可以因人廢言，可能恩法天奴唔會好似柏天尼咁呢？不過回應18同22年世界盃主辦權時，恩法天奴就話到明點都要幫俄羅斯同卡塔舉辦世界盃，理由係相關調查係2010年後，即係決定咗呢兩屆世界盃主辦權之後先開始喎。即係洗濕咗個頭就要行落去？嘩，乜咁似香港啲官同建制派議員支持繼續起高鐵咁嘅？

圖片：fifaworldcups

各位Gentlemen都知，為咗俾俄羅斯同卡塔爾搞世界盃，FIFA都搞到一身蟻。一來引爆咗一大堆有關世界盃主辦權嘅醜聞、為咗俾卡塔爾可以主辦世界盃更加將賽事改喺冬季進行、再強迫歐洲各大聯賽讓路等，都被各國足總、聯賽賽會同唔少球會狠批。隨後嘅貪污醜聞就令幾個同FIFA有長期合作嘅贊助商都曾考慮同FIFA結束合作關係，而呢啲贊助仲要全部都鼎鼎大名，包括Adidas、可口可樂同埋Visa。雖然最後無事，不過FIFA嘅聲譽都已受損害。恩法天奴上任如果願意重啟兩屆世界杯主辦國選舉程序，都係FIFA願意改革嘅重要指標。

圖片：Thomasthethinkengine

呢班國際足壇領導人之間關係千絲萬縷，而且足球過份商業化已經係不歸路，只係換咗個主席都唔代表乜嘢，所以對於恩法天奴，我諗大家都係平常心啦。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。