圖片：premierleague.com

「其實毒撚一個更開心，使＿你講．．．」星期日就係毒男要用黑色筆寫嘅日子－情人節，不過唔緊要，英超賽會非常關照一眾真毒球迷，因為８季英超以來首次 前四球隊對決同日進行就喺情人節發生，到時俾人問起點解情人節咁毒喺屋企，一句「幾時都係睇波緊要過溝女架啦！」何其霸氣！兩場波分別係早場８點，阿仙奴主場對李斯特城，同埋凌晨１２：１５分嘅曼城對熱刺。

狐狸奪冠考牌戰　摸和阿記非難事

圖片：Telegraph.co.uk

兩場波對於前四形勢都好重要，今季又少有唔再係雙曼車阿壟斷前四，前列位置真係好緊張，先講阿仙奴對李斯特城。李斯特城上星期作客曼城，被睇死下技術性以３－１手刃對手，奪標睇嚟真係不是夢，皆因打完今場之後，比較難應付嘅對手（愛華頓、車路士、曼聯）都喺最後三輪，所以今場對爭標嚟講尤關重要。李斯特城今季英超作客只有喺boxing day輸俾利物浦，係英超作客王，絕對唔係無得打架！至於阿仙奴，傷兵已經好得七七八八，基本上可以full team捉狐狸，不過主場成績阿仙奴只排第四，同樣主場只係輸過一場（對手係韋斯咸），二月阿仙奴賽程開始難打，２月２３日歐聯十六強要惡鬥巴塞，之後英超仲要鬥曼聯。計落兩隊都係半斤八兩，好大機會和波收場。

曼城一岩一忽難贏熱剌

圖片：independent.co.uk

另一場比賽就係曼城主場對熱刺，呢場看點一定係阿古路同哈利簡尼兩位神鋒嘅對決，兩位喺英超分別入咗１５同１４球，睇下佢哋今場有無本事入多兩球追住射手榜第一嘅華迪啦。上次曼城主場輸俾李斯特城排名直插落第四，相信曼城都非常希望搶分重回爭標利列，不過本身已經供養一眾文員嘅曼城就有大衛施華腳踭受傷復出無期，除左創造力成疑之外，後防無左甘賓尼亦難以令人放心。相反熱刺已經取得各項比賽六連勝，而且今季仲係失球最少嘅球隊，對住天殘地缺嘅曼城，應該都有機會小勝。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。