富士特急新列車木裝「富士山ビュー特急」

文：MenClub 魏文青　　
POSTED ON 12 Jan 2016

男人老狗就一定會對飛機大炮呢啲機械嘢有興趣，再加上日本嘅鐵道發展真係多姿多彩得好緊要，所以你又難怪日本咁多鐵道迷。好似富士特急近期換新車咁，除咗賣個窗較大可以盡情欣賞富士山，仲賣車廂內嘅木製裝飾營造溫暖感！回望香港嘅…呃…真係羨慕死人呢！

話說行走「大月駅」至「河口駅」富士急行線嘅2000系列車即將於黎緊2月退役，近日富士急行就公佈咗接棒列車「富士山ビュー特急」。新列車由從JR東海購入嘅371系電車改裝而成，原本七卡車廂會改至三卡。而設計師方面就用上之前設計出JR九州豪華列車(クルーズトレイン)「ななつ星in九州」嘅水戶岡銳治。設計主題係「讓乘客可以在45分鐘車程內好好聊天、飲食、觀光嘅空間。」外觀方面沿用「富士登山電車」嘅棗紅色，但為咗增添現代感覺就用上金屬色。內裝就主要以木製品為主，甚至仲有可以比一家人坐嘅飯檯式座位。

如果大家新年諗住去日本旅行，又想上富士山遊覽嘅話不妨留意下啦！
富士急行