EVA新幹線唔經箱根?

文：MenClub 魏文青　　
POSTED ON 24 Jul 2015

冇錯，《EVA》20週年慶祝項目又多一樣，就係同日本JR合作推出嘅「EVA新幹線」！

話說今年係JR旗下「山陽新幹線」通車40週年，咁啱又係EVA動畫開播二十週年，所以雙方就決定撈埋一齊做瀨尿牛丸，搵黎EVA總監督庵野秀明以及機設山下いくと，以初號機做藍本，改裝其中一列500系列新幹線列車。而且唔係得個樣，JR指車廂內部裝飾亦會以EVA為主題，雖然冇公佈詳情究竟係點，但淨係FF下有綾波麗把聲同你個「下一站係…」都夠頂癮啦！我仲期待緊啲位會唔會係插入栓咁嘅樣架！

好啦，最重要嘅問題黎啦：呢架車究竟幾時出現，行嘅路線又係邊條？JR就冇公佈確實投入服務嘅日期，不過就話起碼都會服務至2017年3月，所以應該有足夠時間等你黎坐。至於行走路線，話到明係同「山陽新幹線」合作，咁就緊係行返佢條線。而「山陽新幹線」就係由博多開出，沿日本南海岸到新大阪。換言之，全程都喺關西，連箱根條毛都掂唔到。咁又好似差咁啲嘢喎！
500Type-eva project