日本兩大超人，幪面超人(Rider)同咸蛋超人(Ultraman)。前者近年越做越把炮，唔單止電視電影長出長有，玩具Figure都有大把Fans。但反觀咸蛋超人新作《X》又插卡又變裝又戴Headphone又盛，結果都係畀人鬧佢冇嗰樣整嗰樣。

但其實你誤會咗佢哋啦！因為「冇嗰樣整嗰樣」睇黎係佢哋嘅最新路線！

點解文青講到咁實牙實齒呢？話說Ultranman今年五十週年紀念，唔知係咪為咗慶祝，黎緊11月會喺東京藝術劇場演奏廳搞一個名為《Ultranman Symphony Concert 2015》嘅交響樂演奏會。搵黎曾經參加過09同10年兩隻Ultranman CD《Ultraman on Brass 1》、《2》以及《Ultraman Zero-THE MOVIE》音樂製作嘅矢澤定明做指揮。

你先唔好理點解Ultraman要整音樂會，而唔係運動會、園遊會甚至係天下第一武道大會，反正佢都唔係「冇嗰樣整嗰樣」嘅精髓。真正嘅精髓，係佢哋為咗個演奏會整咗個全球限定一個咁大把嘅小提琴！

呢個咸蛋超人小提琴主體用上雲杉和楓木，配件就以高貴嘅黑檀木(Ebony)打造。請恕小學連牧童笛都吹唔好嘅文青孤陋寡聞，真心唔知究竟呢幾種木整出黎嘅小提琴有幾好聲，我淨係知道外表睇落就一定睇唔出－－因為佢仲會油到咸蛋超人咁嘅色！

價錢方面，如果你只係想聽個演奏會，門票就由5000Yen(約315港元)到15000Yen(約950港元)不等。但如果你想買個小提琴返屋企，就要首先報名參加抽獎、抽中、再付出「向M78星雲(Ultraman故鄉)致敬」嘅780,000Yen(約49,200港元)先得。又唔係話天價，但又唔係一個正常Fans捨得比嘅價錢咁囉！

我真係好想知佢哋當初係咪諗：「人哋拉打，我哋拉小提琴啦一於！」