首先，去得睇呢個展覽，大家都係尋求一種集體回憶。你可能係當年睇《鐵甲萬能俠》大、又或者好似文青咁係打機戰(超級系)學返黎。但無論如何，你都會承認呢部日本動畫史中第一台搭乘式巨型「銀芽」係有其歷史意義嘅。係會令你諗返起當年睇麗的、又或者打機戰嘅日子。既然係咁，最重要嘅就搵唔搵得返啲回憶先？

好彩，製作單位用過百萬搭出黎嘅大型場景（位於商場UG2)係冇揸流灘。唔計商場外面嘅七米高萬能俠，這場入面都仲有人咁高嘅鐵甲萬能俠2號、愛美神、大鐵牛，以及同由永井豪老師創作嘅初代三一萬能俠、巨靈神雕像。而且造功仔細、面口又冇崩壞、隻二號仲鬼咁大胸，淨係影相放上網呃Like都抵去啦！

睇到呢張相，我終於明白點解當日永井豪老師要搵篠崎愛黎Cosplay萬能俠二號。

至於位於商場L2嘅珍藏展覽，就展出咗永井豪老師嘅親筆手稿，以及由忠實萬能俠迷盧子英先生借出、七十年代時以鐵甲萬能俠(系列)為封面嘅日本TV Magazine雜誌，對於一眾上咗年紀嘅粉絲黎講就應該更有味道。

同場仲有今次展覽嘉賓吳克群主理嘅「DEBRAND」品牌攤位，出售一系列萬能俠聯乘產品。

而位於UG2嘅「光子力研究中心」其實係一個期間限定嘅Pop-up Store，售賣萬能俠為主題嘅T恤、風褸、文具、iPhone殼(該死的iPhone)等等等等，而且價錢頗為合理。例如文青見到T恤一件$250、風褸一件$350，iPhone殼都係一百幾十，喺整棟商場黎講直頭叫平添！

不過成間鋪最吸引人嘅，始終都係會場限定預訂嘅Figure，吸引到未開鋪就已經有人隔住個欄杆要落訂。其中有GETTER ARC同GETTER ARC BLACK (會場預訂價$990)、SHIN GETTER DRAGON同SHIN GETTER DRAGON BLACK(會場預訂價$1690)、超合金鐵羅剎(會場預剖價$1280)同香港設計師ERIC SO設計嘅鐵銹版萬能俠(會場預訂價$2980)。想入手嘅Gents都不妒去望下。