Ubisoft上個月突然宣布進行大規模改組，關閉工作室兼裁員縮編，隨即觸發大批員工群起罷工抗議，公司一時間陷入動盪。面對前景不明朗以及外界種種質疑，Ubisoft CEO Yves Guillemot近日終於打破沉默，接受外媒訪問時大派定心丸，表示旗下兩大皇牌IP《Assassin's Creed（刺客教條）》同《Far Cry（極地戰嚎）》正在開發多款新作。

Yves Guillemot接受外媒《Variety》專訪時透露，呢批新作將交由去年成立、並獲騰訊注資嘅子公司「Vantage Studios」負責操刀。其中《Assassin's Creed》系列目前有「幾款」作品處於開發階段，涵蓋單人及多人連線玩法，目標係進一步擴大上年已突破3000萬名玩家嘅龐大社群。至於另一個人氣IP《Far Cry》，佢就話手頭上已經有兩個「非常有前景（very promising）」嘅項目正在推進。

Yves Guillemot

雖然CEO講到前景一片光明，有多款大作排隊出爐，但其實Ubisoft內部正面臨史無前例嘅大危機。皆因Ubisoft上個月宣布進行「大洗牌」重組兼縮減成本，直接腰斬咗6款遊戲、延期7款，仲執埋兩間工作室。更誇張嘅係，巴黎總部計劃裁減高達200人（約佔當地18%人手），加上高層強行取消居家辦公政策，最終成為導火線，觸發大批員工罷工抗議，甚至有工會要求CEO落台。與此同時，Ubisoft去年將接管兩大皇牌IP嘅新子公司「Vantage Studios」，交由CEO個親生仔Charlie Guillemot共同掌管，呢種疑似「用人唯親」嘅操作亦係員工不滿嘅核心原因之一，令員工對管理層嘅信任進一步破裂。

面對外界抨擊，Yves Guillemot喺訪問中都有稍為開腔解畫，不過最後都只係講埋啲「佢擁有豐富經驗」、「任命係基於能力同業績」嘅標準官腔，完全無法平息員工憤怒。至於罷工同裁員風波，佢就話表示「完全理解團隊嘅合理擔憂」，並重申為咗確保公司長遠財政健康，呢種轉型陣痛係在所難免。

睇嚟Ubisoft今次真係走到生死存亡嘅十字路口，一邊要處理內部員工士氣低落兼抗議不斷，另一邊又要孭起極大壓力，確保下一款《Assassin's Creed》同《Far Cry》新作絕對不容有失，藉此重新挽回玩家們對公司嘅信心。