披住可愛畫風、內裡卻暗黑獵奇嘅奇幻漫畫《來自深淵》，繼第二季動畫《烈日的黃金鄉》完結一段時間後。近日官方終於公開續作劇場版《來自深淵 覺醒的神秘》首條特報影片，並定檔今年秋季於日本正式上映。各位深淵探窟家，又係時候準備定足夠嘅胃藥同紙巾，迎接新一輪嘅絕望與感動。

《覺醒的神秘》將由製作過兩季電視動畫同2020年劇場版嘅Kinema Citrus繼續操刀，而導演小島正幸、編劇倉田英之、音樂Kevin Penkin、角色設計黃瀨和哉與黑田結花等原班人馬亦會全數回歸。

電影劇情將接第二季動畫內容，從目前官方公開嘅資訊，以及兩位新登場角色「媞帕絲特」同「格萊瓦利」嘅設定，故事預計將聚焦於原作嘅「咒詛船隊篇」。雖然特報影片配樂聽落好似好熱血，但熟悉原作嘅朋友都知，隨住探窟愈深入，面對嘅危險同絕望感亦會幾何級數上升，相信今次劇情嘅「致鬱」程度絕對唔會輸畀黎明卿或者法普塔篇章。

目前電影已定檔2026年秋季於日本率先上映，雖然香港方面暫時仍未公布代理消息，但以呢個IP嘅人氣程度，而且上集劇場版亦有喺香港上映，相信好快就會有好消息，各位Fans拭目以待吧。