日前舉行嘅NFL超級碗比賽係美國全民關注嘅盛事，各家公司亦爭相於比賽期間落廣告宣傳。不過較為出乎意料嘅係，Netflix亦選擇於超級碗期間，公佈由Brad Pitt主演、David Fincher執導嘅《Once Upon a Time in Hollywood》劇集版首條預告。而且整個安排都頗有深意，似乎代表Netflix非常重視呢套劇。

首先有深意嘅，係預告公開日期。據《Deadline》報導，Netflix之所以選擇「2月8日」公開預告，並唔係單單為咗超級碗嘅人氣，而係因為電影中Cliff Booth（Brad Pitt飾）與 Rick Dalton（Leonardo DiCaprio飾）於酒吧內商量未來嘅日期就係2月8日。所以揀呢日公開劇集版預告係有呼應電影版之意。事實上劇集版嘅時間線似乎亦係緊貼電影版。預告一開始就可以見到Cliff Booth腰同膝頭都敷住冰，並向Elizabeth Debicki飾演嘅角色坦白自己幫Rick「制服咗啲嬉皮士入侵者」，亦即電影版嘅結局。

而預告嘅另一層深意，就係入面所有煙、酒、爆力、裸露部份，都用非常明顯嘅霓虹線條遮住，同時角色們講粗口、舉中指嘅部份亦同樣被「嗶」走及遮掩。而預告一開始亦加入一張來自虛構政府部門「Bureau of content compliance」嘅免責字卡，指「本特別預告的所有內『現在』都得到當局許何向所有人播放。」似乎就係諷刺某人（可能係Netflix？）要求刪去敏感內容？

雖然劇情目前仍然保密，但據報劇集會講述Cliff Booth唔再做替身，而改做幫人擺平麻煩事嘅「荷里活Fixer」。預告中亦見到Brad Pitt穿梭於不同荷里活場景，應該就係佢嘅任務片段。另外值得一提嘅係，預告中係無出現劇集名稱，所以目前仍未知劇集叫咩名；同時亦無公佈播放日期，只有「Coming Soon」字眼。

資料來源：Deadline