隨住Michael Jackson傳記電影《Michael》將於4月上映，官方今日公開正式預告！飾演MJ嘅親侄仔Jaafar Jackson，除咗「神還原」叔叔嘅經典舞步同神態，預告仲揭露咗MJ同嚴父Joe Jackson之間充滿張力嘅父子關係，帶觀眾了解呢位傳統巨星背後鮮為人知嘅一面。

從預告可見，電影將會全方位還原Michael Jackson由The Jackson 5童星年代，一步步走到去世界巔峰嘅歷程。畫面涵蓋咗佢第一次表演Moonwalk、《Thriller》橫掃格林美獎、同Quincy Jones錄音，以至拍百事廣告燒著頭髮送院嘅驚險一幕，甚至連佢隻寵物猩猩Bubbles都有份登場。

除咗重現經典時刻，電影亦會探討MJ同嚴父Joe Jackson（Colman Domingo飾）之間嘅角力。片中可以見Joe自細就對幾個仔有極高期望，鼓勵佢哋力爭上游：「人生在世，一係就做贏家，一係就做輸家。你哋係咪想好似我咁，成世人都喺間鐵廠度做到死？」而當MJ逐漸成名，對事業發展有自己諗法時，兼任經理人嘅Joe就即刻喝止：「我咪話咗畀你聽要諗啲咩囉！（I told you what to think）」直接道出呢位天王巨星背後，曾長期受父親高壓控制。

《Michael》由《Training Day（邊緣特訓）》導演Antoine Fuqua執導、《Bohemian Rhapsody（波希米亞狂想曲）》編劇John Logan操刀劇本。據了解，電影初剪版本長達4小時，但礙於片長及法律版權問題，片商極大機會將電影拆成兩集上映。即將上映嘅可能只係「上半集」，只會講到MJ喺1980年代最輝煌嘅時刻（大約係《Thriller》或《Bad》時期），至於後半生嘅經歷或者會留返「下半集」先講。不過最終係點，都要視乎今集票房反應，片商先會決定係咪推出續集。