由傳奇影業（Legendary Pictures）開發多年嘅《高達》真人版電影，幾經波折後終於有新進展，終於確定由Netflix負責發行！據聞呢部由Sydney Sweeney同Noah Centineo共同主演嘅電影，故事將會走「羅密歐與朱麗葉」式嘅悲劇愛情路線。

其實傳奇影業早於2018年就宣布籌拍《高達》真人版，當時原定同Netflix聯手製作，並邀請《Kong：Skull Island（金剛：骷髏島）》導演Jordan Vogt-Roberts執導。不過雙方其後未能達成共識，計劃一度擱置。之後傳奇影業轉而同Bandai Namco Filmworks聯手重新開發，並搵嚟Netflix人氣劇集《Sweet Tooth（鹿角男孩）》主創Jim Mickle接手，兼任導演及編劇。兜兜轉轉之下，項目再次回到Netflix手上，雖然佢哋今次冇直接參與製作，但就會負責發行工作。

據外媒《THR》引述消息指，呢部由Sydney Sweeney及Noah Centineo兩大新世代紅星主演嘅電影，將以兩名分屬敵對陣營嘅機動戰士駕駛員為主角，兩人於星際戰爭中相愛，並發展出一段注定悲劇收場嘅戀情。對於一眾資深高達迷嚟講，呢種「敵對陣營戀曲」設定自然會令人聯想到90年代經典 OVA《第08MS小隊》。

目前仍未知電影會否直接改編呢套UC宇宙作品，定抑或好似其他高達作品咁自創獨立時空，但至少可以確認，呢部《高達》真人版仍然持續推進中。唔知各位高達迷又期唔期待呢？

資料來源：deadline、THR