目前Netflix及Skydance Paramount（以下簡稱Paramount）正就收購Warner Bros. Discovey（以下簡稱WBD）爭到面紅耳熱，前者上週出價 827 億美元收購WBD旗下嘅影視及串流業務並獲WBD答允，後者則於星期一宣佈以更高嘅 1,084 億美元收購整間WBD，並揚言Netflix嘅收購根本過唔到美國政府嘅規管。不過長年打滾華府監管戰場嘅法律專家 Andrew Lipman於接受《Deadline》訪問時，就估計Netflix收購WBD唔會有咩監管上嘅阻礙，認為Netflix將能成功完成收購。

Andrew Lipman早前出席瑞銀主辦嘅傳媒與通訊會議時表示，佢唔太同意 Paramount 所講「監管會否決 Netflix 方案」嘅說法，仲話Netflix收購WBD嘅整體難度「唔見得比 Paramount 個案高」。佢認為，監管機構的確會審查收購後Netflix是否能夠壟斷市場，但佢哋眼中嘅「市場」唔只係影視串流服務，而係「所有搭奪觀眾眼球嘅平台」，換言之 YouTube、TikTok、Facebook 等都喺呢個「市場」之中，咁相比之下即使Netflix收購WBD，亦唔見得會有幾壟斷。Andrew Lipman亦指出串流市場本身好動態，美國觀眾平均揸住四個半到五個串流服務，轉台成本亦唔高，難以用傳統「一間公司壟斷」嘅框架去判定。

Andrew Lipman亦指唔認為特朗普總統會為Netflix收購案加入阻礙。佢指出現任司法部反壟斷法負責人 Gail Slater 雖然非常嚴謹，但就願意接受收購方提出嘅「和解協議」，亦即只要公司答案某啲條件，佢哋就會放行收購案。今年就已經有十多宗收購係用類似方式通過。佢指出其中一個條款可能係美國政府將會擁有新公司嘅「黃金股」，即比一般股票有更重要投票權嘅特別股票，以保證美國政府能對企業產生影響力。

此外美國政府亦可能會提出「行為條款」，即要求企業做，或唔做某啲行為。對此Netflix其實早有準備。上週宣佈收購WBD後，Netflix就已經公開講明WBD製作嘅電影未來會繼續於院線上映，目前亦無打算將Netflix及WBD旗下嘅HBO Max合併。Andrew Lipman估計美國政府可能會提出Netflix於電影嘅院線榴期及獨佔時間，以及內容授權、轉授權等地方作出承諾。

講到尾，Paramount最終能否成功截糊，重點在於股東們信唔信佢提出嘅方案比Netflix嘅更好。而如果你信上述嘅分析，Netflix收購案嘅最大弱點其實係唔存在嘅。咁就睇Paramount相對更高嘅出價、以及收購整間WBD而非單單影視及串流業務嘅提案，會唔會更得股東們嘅歡心啦。

資料來源：Deadline