由金像大導James Cameron操刀嘅《阿凡達：火與燼（Avatar: Fire and Ash）》將於下月正式上映，但佢最近接受訪問時就坦言，若然今集賺得唔夠多、無法說服迪士尼再投資。咁佢就會放棄拍攝第4及第5集，改為寫一本書交代餘下故事。

James Cameron日前接受Podcast節目《The Town》訪問，直言對《火與燼》票房表現感到張，一來係串流平台崛起改變了觀眾觀影習慣，現時美國戲院入座只回復到2019年嘅75％，二來係觀眾對續集往往會產生「續集疲勞」心理，除非好似《魔戒三部曲：王者再臨》嗰種大家迫不及待想知結局嘅作品，否則唔係咁容易跨過呢個心理關口。雖然佢自覺《火與燼》係阿凡達首三部曲嘅最終章，但同時亦坦言：「我唔肯定觀眾會唔會覺得第三集係必睇嘅結局。」

當被問到《火與燼》製作成本時，James Cameron雖然拒絕透露實際金額，但就暗示花費驚人：「呢部電影係用咗一公噸嘅錢去拍（原句：one metric f**k ton of money）），即係我哋要賺返兩噸嘅錢先有盈利。我相信部戲一定會賺錢，但問題係賺得夠唔夠多，值唔值得我哋再拍一部。」佢又補充，如果《火與燼》票房表現唔理想，佢已經做好心理準備告別呢個系列：「我已經喺《阿凡達》世界浸咗20年，其實應該係30年，因為我1995年就寫好劇本，只係頭十年投入唔算密。如果《火與燼》係終點，其實都唔算壞事。」而未完成嘅故事線，佢就表示可以透過寫書交代。不過James Cameron同時強調，就算唔再親自執導，他都絕對唔會將《阿凡達》系列完全放手交畀其他人，最少都會擔任監製身份，並密切參與其中，確保作品方向仍由佢主導。

《阿凡達：火與燼》將於今年12月18日正式上映，唔知全球票房能否超越前作嘅23.2億美元呢？