早前我哋曾報導過，英國AI製作公司「Particle6」推出首位AI演員「Tilly Norwood」，而且仲吸引到荷里活經理人公司打算同佢簽約。後來著名演員如Emily Blunt、Ryan Reynolds，以至美國演員工會（SAG-AFTRA）都出面批評「AI演員」呢個概念做乏血肉，「Tily Norwood」以至「Particle6」創辦人Eline van der Velden更被網民不停騷擾到要報警求助。而近日Eline van der Velden接受《The Hollywood Reporter》訪問時，就澄清佢哋最終目的唔係打算以AI演員代替真人，而係希望開創出一個全新嘅影視種類「AI電影/劇集」。

圖片：tillynorwood.com

於訪問中，Eline被問到爭議過後是否仍有經理人公司打算簽下「Tily Norwood」。對此Eline表示近來仍有相關嘅討論，但佢哋會輕微改變方向，希望搵一間專門代表AI演員嘅經理人公司。同時佢亦指出爭議過後Tily嘅人氣大漲，甚至有「廣受好評、獲獎的導演、編劇、演員」主動聯絡佢哋。

不過佢亦指出，自己曾拒絕要Tily取代真人演員嘅邀約，並指：「我非常珍惜真人演員，除非係獲得演員嘅同意後製作數碼替身，否則我哋唔希望用AI演員去替代任何真人演員。」佢亦強調Tily亦唔係為咗要代替真人，而係應該活喺佢自己嘅「宇宙」之中。

圖片：tillynorwood.com

而呢個「宇宙」係指啲咩呢？Eline表示佢哋認為未來嘅戲劇可以分為三個種類：動畫，傳統真人，以及AI。佢認為理想地，Tily（以及未來其他AI演員）應該只出演100%用AI製作、採用AI演員嘅作品，而呢類作品就係佢口中嘅「宇宙」。其實聽落就有啲似動畫製作，只係唔再用鍵盤滑鼠去直接操縱角色，而係要「指導」一個有若干自主性嘅「演員」去做戲。

同時佢亦呼籲真人演員唔需要擔心：「我自己都都仲係想睇到Scarlett Johansson同Ryan Reynolds真人演出。」但佢亦提出未來可能係真人演員希望進入AI電影宇宙，「我哋可能會幫佢哋整個數碼替身，咁佢哋就可以出演AI作品，多一個收入來源。」

資料來源：The Hollywood Reporter