睇下Pop Mart開到全世界週圍都係，你就知目前全球都興起一陣盲盒玩具潮，而呢股熱潮嘅重心之一當然就係由BLACKPINK Lisa帶紅嘅Labubu。而據外媒報導，Sony已經已經買下Labubu嘅電影版權，換言之可能好快大家就可以於大銀幕上見到Labubu身影——唔知你覺得係好事定壞事呢？

據《The Hollywood Reporter》報導，Sony上週成功簽下Labubu嘅電影版權，未來將會開發相關電影。據報雙方唔係只打算拍一部戲咁簡單，而係希望第一部電影成功的話，就順勢建立一整個電影系列，換言之未來可能會有多部Labubu電影。但由於雙方只係啱啱簽約嘅關係，所以目前連會拍動畫定係真人電影都未知，自然亦未有導演、演員人選——你話拍真人電影然後有Lisa出演，咁票房就應該有所保證啦。

BLACKPINK Lisa

Labubu由比利時籍、香港出生嘅藝術家龍家昇於2015年設計，原本係出自其《The Monsters》故事系列。2019年後Labubu與中國著名玩具製造商Pop Mart合作，推出一系列有各種大小、顏色、造形、材質嘅公仔。去年4月時BLACKPINK成員Lisa被拍到佩帶住Labubu鎖匙扣，將Labubu帶入潮流領域，並引起瘋搶炒賣風氣。

資料來源：The Hollywood Reporter