繼2022年爆笑短劇《Man Vs Bee（人來蜂）》後，「戇豆先生」Rowan Atkinson再度與原班製作團聯手，帶嚟全新續集《Man Vs Baby（人來瘋：奇寶過招）》！今次佢嘅對手唔再係蜜蜂，而係一位可愛又百厭BB仔。

喺上集《Man vs Bee》入面，Rowan Atkinson飾演嘅笨手笨腳管家Trevor，因為對付一隻煩人又狡猾嘅蜜蜂，結果搞出連串笑料，並釀成巨大災難收場。而今集故事，就係講述Trevor經歷上次慘痛教訓後，決定告別高壓嘅管家工作，轉去做相對清閒嘅學校工友。

點知喺學期最後一日，竟然冇人嚟接走喺聖誕劇飾演「小耶穌」嘅BB仔。而偏偏呢個時候，Trevor又收到一份報酬豐厚嘅臨時工邀請——要佢喺聖誕假期期間看管一個位於倫敦嘅豪華頂層公寓。面對誘惑，Trevor當然忍唔住再次出山，仲決定帶埋呢位「新拍檔」BB一齊開工，結果Trevor要一邊看管公寓、一邊湊住BB，唔知佢又會搞出咩大頭佛呢？

《Man Vs Baby》全劇共有4集，每集30分鐘，將於12月11日在Netflix播出。